恒生銀行（00011)，嘅人民幣黃金ETF尋日上市，咁啱尋日係一年一度嘅情人節，一眾出席恒生新產品上市儀式嘅來賓，當然會收到恒生特別訂造嘅情人節禮物啦。
為配合恒生尋日新推出嘅人民幣黃金ETF，呢批朱古力係以黃金色嘅紙包裝而成，金條形十足，再喺包裝紙上印有「RMB」字眼，十分有意思喎，而港交所亦收到恒生嘅琉璃龍擺設作留念。
絲絲覺得恒生總係對朱古力情有獨鍾，數番剛過無耐嘅新春，恒生就送咗財神朱古力，對上一次人民幣黃金ETF發布會，都送過朱古力o架，連分行都有得派。其實絲絲早前都出席咗花旗集團嘅二百周年慶典，都係收到朱古力做禮物，係藍色嘅m&m，朱古力背面印有二百周年字眼，同恒生特製禮物嘅意念同出一轍。
諗諗下，朱古力可食落肚，好過送其他得個睇字嘅擺設，又或者唔係人人啱嘅禮物，恒生作為綠色銀行，專注你嘅同時都為環保出一分力，減少廢物。