新世界發展（00017）剛剛舉行集團嘅二○一二周年晚宴，成個集團中港各地都派員工參加，出席者過千人，送獎都要110份，人數大到要響會展大禮堂筵開過百席，場面熱鬧之餘，絲絲都有啲感慨。
事關今次晚會，特別喺入口設一條「時光隧道」，展覽集團過去40多年嘅發展歷史，重溫70年代至今嘅發展里程。可惜絲絲見唔到偶像——集團主席彤叔（鄭裕彤），集團前總經理堅叔（梁志堅）亦辭咗任。主持大局嘅，係董事總經理純官（鄭家純）、執行董事鄭志剛兩仔爺，以及現任總經理陳觀展，象徵集團真係步入咗新嘅世界，新梯隊正式接班！
每位在座員工，未食飯先由純官獎一舊水利是，同場仲有才藝比賽，由各地附屬公司派高手參加，當中最突出都係內地同事，個個都有番咁上下水準，有四川同事表演國粹變臉得第二，最後由新創建轄下廣州同事嘅唱歌跳舞，有春晚表演質素而奪冠。而壓軸神秘大獎，由純官父子一齊送出價值17萬嘅萬事得房車，由K11同事接車匙。