絲絲講場：康宏王利民投保好艱辛
俗語說「能醫不自醫」，估唔到都適用於保險，話說康宏理財（01019）主席王利民（Quincy）平時幫唔少客戶投保，但到自己投保時卻處處碰壁，皆因早前佢驗身時，先發覺自己心血管有些少閉塞。
血管閉塞 一等兩年
Quincy話保險公司已經好畀面，當初無直接拒絕佢投保，只喺同Quincy講其實佢健康狀況喺OK，但想觀察多一陣，點知呢「一陣」就觀察咗兩年，直到早前Quincy再驗身時，發覺條血管奇迹般通咗，先有保險公司肯受保，不過因為Quincy「有前科」，保費自然貴一大截。
Quincy出咗名係運動健將，前排先去完沙漠跑馬拉松，點睇都唔似有呢種富貴病。Quincy估自己可能衰食嘢忍唔到口，所以只好做多啲運動，跑步正係其中之一，練練吓就跑埋馬拉松。尋日正好喺情人節，Quincy都相約老婆喺月光下跑步，認真浪漫。