絲絲講場：「紅軍」衰歧視 渣打一肚火

利物浦蘇亞雷斯有前科

話說渣打真金白銀贊助嘅英超「紅軍」利物浦，來自烏拉圭嘅球員蘇亞雷斯，拒絕同對手「紅魔」曼聯嘅法籍帶非洲血統嘅防守球員艾拉握手，涉嫌種族歧視。呢個球員有前科，亦係因為歧視同一名球員而被停賽八場。

雖然當事人同球隊經理已經為事件道歉，但醜聞仍惹渣打不滿。梗係啦，渣打贊助咗利物浦成8,150萬英鎊，今次球隊搞出個大頭佛，果真貼錢買難受。

白承睿借錢遲申報出事

渣打唔單只遇着呢件「當黑」事件，就連集團執行董事白承睿都遇到麻煩事。唔知係咪佢貴人事忙，佢曾經將公司股份押咗畀外國銀行借錢，遲咗向公司申報，累到公司畀監管機構「的」咗去問話。

英國金融服務管理局（FSA）講到明，董事用股本做抵押借錢要四日內向公司申報，但係白承睿上年十二月二十八日，用咗15萬股押咗畀間塞舌爾（Seychelles）銀行借錢，係今年一月二十日先同公司講，足足遲咗三個星期。唔講唔知，原來塞舌爾係西太平洋嘅一個島國，唔通白先生去度假兼借錢？