市場熱線：大光燈長揸短炒
港股尋日玩牛皮，得百零點上落，成交亦縮到得561億元，唔通又等希臘？其實尋日唔算風平浪靜，穆迪將6個歐元區國家降級，魚生國突然將買債規模加大一半，奧巴馬提財政預算搵有錢佬開刀，社保基金減持兩隻祖國錢莊股，東亞（00023）成績表令人失望，咁多因素加埋似乎係偏淡。雖然亞洲魚缸有升有跌，但對港股較大影響嘅A股同美股期指則偏軟，不過，港股靠晒中港地主股力頂，恒指收市仍升30點，國指則跌54點，下跌股數亦多過上升股份。
個市係升唔上抑或跌唔落，純屬見仁見智；等如睇個市係散貨定震貨，好友同淡友嘅視角永遠都唔同。淡友可能認為大戶頂住地主股去散貨，但好友亦振振有詞，歐豬降級已經全無反應，歐美日齊齊放水，真係唔買股票就笨。古勝覺得恒指圖陰陽怪氣，收市後期指轉番高水，但決定再觀望埋今個禮拜先算。
數碼通上了一課
本地地主股發威可以用樓市小陽春去解釋，但估唔到內房股咁快可回升。業績股最驚見光死，東亞固然落筆打三更，就算成績表合格嘅洛鉬（03993）亦因突然唔派息而被質低7.4%。仲有半個月就係放榜高峰期，除咗成績表打定輸數之外，派息政策亦係關鍵，公司可能受希臘感染而收緊荷包，又或者留錢諗住執平貨，高息股亦未必再派錢。
數碼通（00315）搞出個大頭佛，唔單止客戶怨聲載道，投資者會覺得管理層有問題。其實間間企業都會出現危機，但有危機要識處理，好似雨潤（01068）發完盈警即刻開埋分析員會議，除咗解釋倒退原因之外，亦話今年初已改善，股價尋日已輕微回升。
「細賭場」呢兩日重新開業，名家（08108）由做傢俬改行做殯儀即勁升43%，由生人安居變死人安葬，由木造變紙紮，如果轉型成功可算特別例子。
大光燈（00165）變身做金融股已好多年，生意範圍亦愈做愈大，除咗錢莊同證券生意之外，亦發大到資產管理、直接投資、私募基金、創投基金等，截至舊年中每股帳面值約16.2元，但隱藏價值則比較難計，管理層話風險基金旗下投資嘅好幾個項目已籌備喺A股上市，以前嘅投資已經有好高回報，當中仲有兩個醫藥項目賺咗幾倍添。
大光燈未來增長可能大部分來自直接投資同風險投資，但光大銀行今年可否登陸香港上市仍係好多人關心，上市成功應該會有沖喜作用。
未反映真正價值
至於光大證券則因舊年A股疲弱，全年賺少接近3成，光證仲計劃瘦身，但A股年初已有少少翻生，今年情況應該會有起色。
大光燈話晒係金融股，呢排亦跟住個市回升，古勝相信隻股未反映真正價值，由20蚊樓上跌到最低7.4元，依家連返回跌幅一半都未到，長短線都有得諗。