孖妹缸湖遊：股市燈謎猜情尋
今日係元宵佳節，有咩好玩？咁啱孖妹度咗十條「股市燈謎」畀兩位金融界好朋友玩吓，不如大家都應吓節日氣氛，一齊試吓去猜燈謎？話唔定可以喺謎底之中搵到投資玄機架！
郭：海通國際中國業務部副總裁郭家耀
東風目標價睇16元
祺祺：果然係缸湖中人，十條竟然答中九條，犀利呀！
郭：你啲燈謎都幾難估，係我好彩撞中啲答案啫，不過都幾好玩。
祺祺：今日係元宵佳節，你又啱啱新婚，諗住點同太太慶祝先？
郭：哈哈！我份人好傳統，結婚之後我同太太間唔中都玩吓煮飯仔，咁我對佢嘅廚藝都有少少喜出望外，至少我無食到肚痛先呀！其實今日都無咩特別慶祝，我諗住叫佢煮芝麻湯圓畀我食囉，最多之後我幫手洗碗喇！
祺祺：一個煮湯圓，一個就洗碗，真係冧到爆燈喇！我都係同你講番股票好喇，唔知燈謎之中有無邊幾隻股票，散戶可以考慮入貨呢？
郭：東風汽車（00489）同越秀地產（00123）都有得諗吓！舊年因為汽車銷售補貼完咗，加上日本大地震令汽車零部件出現斷貨情況，令銷售量受到影響。不過依家呢兩個壞消息已經消化，加上今年汽車市場憧憬緊新補貼措施推出，同新能源汽車概念對汽車行業都有正面影響。舊年華晨中國（01114）跑出咗，令其股價及估值都升晒上去，如果散戶仲睇好汽車板塊，就大有可能先沽華晨，再揀另一隻汽車股炒過，而我相信東風被炒上機會幾大，近期仲有唔少機構投資者喺度買緊貨。我建議散戶可以喺13蚊買入，目標價睇住16蚊先。
祺祺：咁隻越秀呢？呢隻股票好受散戶歡迎架喎，我成日落魚缸都聽到散戶唱do-re-mi架！
郭：內房股最黑暗嘅日子已經過咗，中央對房地產市場嘅調控政策亦已見到效果，所以我唔覺得中央會再加碼整殘樓市。而越秀本身股價唔貴，加上又有紅籌背景，好少話會出現財政困難，所以散戶會鍾意炒佢，因為既好玩又夠穩陣。由於越秀舊年個股價都跌得幾深，今年博反彈機會自然提高，而且佢手上都有唔少樓盤，當房地產市場回暖，佢啲樓盤賣得好就有錢賺。但我暫時睇到嘅水位唔算太多，目標價喺1.5元左右。
祺祺：元宵節要食湯圓就大家都知呀，所以我都諗緊啲食品股有無得炒？
郭：都有架！好似嗰隻中國玉米油（01006）就啱啱發咗盈喜，因為佢除咗做玉米加工，依家仲搞埋品牌銷售，令搵錢來源增多咗。另外喺內地啲機場，永遠都見到人食康師傅（00322）嘅杯麵，可見食品股係必需品。加上現時食品同原材料價格無再急升，有助食品股嘅成本控制，令毛利率上升。至於港股方面，我覺得二、三月會有個調整，到時又係業績期，散戶可以趁調整時入市買啲貨，總之慢慢炒，千祈唔使太急。
蔡：法興環球股票產品策略師蔡秀虹
中移窩輪成交活躍
高妹：啲燈謎咁難，你都估中八題！咁你點過元宵佳節呀？
蔡：我平時鍾意同老公一齊去做義工嘅，不過今日係星期一，又無義工做，所以我諗住同佢去公園行吓，睇吓靚花燈之餘，順便估吓啲傳統元宵燈謎，唔同你呢啲股票燈謎架！
高妹：又喺度晒恩愛！都係同你講番輪證市況好過，至少對我有啲用嘛！
蔡：港股當然係繼續受外圍因素影響，所以短期嘅指數產品會係市場焦點。我就建議散戶喺睇好嘅情況下，買吓恒指牛證，好過揀恒指call輪；睇淡時就買吓啲恒指認沽證，好過揀恒指熊證。點解咁揀呢？原因係當大市上升時，散戶嘅恐慌情緒會下降，令風險溢價同埋引伸波幅都會同時下降，而由於恒指認購證未必可以跟足恒指，所以揀唔受引伸波幅嘅牛證會比較好喇！相反，如果大市偏軟，風險溢價上升，揀恒指沽證就大有機會賺波幅之餘又賺埋個價。
高妹：咁啱專家喺度就好喇！其實近期我對中移（00941）嘅窩輪有啲興趣，唔知你點睇呢？
蔡：近期中移喺市場上成交都幾活躍，我建議你可以揀啲中期價外輪，實際槓桿會比較高，但引伸波幅會較低，而三個月場外期權就低於20%左右喇。其實現時中移嘅股價多數喺77至78蚊之間橫行，如果你估佢個股價之後能夠有所突破，咁都可以揀啲高行使價嘅認購輪玩吓！
高妹：多謝你嘅意見！咁我唔阻你同老公仔去行公園喇！祝你元宵節快樂！
短期你會增加人民幣相關投資嗎？
近期人民幣產品推陳出新，RQFII（人民幣合格境外機構投資者）基金陸續登場之餘，部分銀行亦推出逾2厘的人民幣定存優惠。短期你會增加人民幣相關投資嗎？
謎底（答案）
1. 修身堂（08200）
2. 越秀地產（00123）
3. 中移（00941）
4. 霸王（01338）
5. 中國人壽（瘦）（02628）
6. 青蛙王子（01259）
7. SOHO中國（00410）
8. 阿里巴巴（01688）
9. 中國旺旺（00151）
10.東風汽車（00489）
若有料報畀高妹同祺祺或有嘢問，可電郵money.biz@opg.com.hk
高妹、祺祺