市場熱線：粵投水源充足

所謂升市莫估頂，鐘擺理論可以繼續超買，所以恒指再衝到幾高只係斷估。對於一直贏開嘅股友嚟講，手上嘅股定好止賺位先行觀望，繼續炒落後亦得，因為就算水尾仍有好多股未郁。不過，對於遲咗入市嘅股友就會十五十六，古勝唔建議高追急升股。

雞犬皆升莫高追

外圍方面，花旗失業率降到8.3%，創三年新低，而道指就創四年新高，納指更創十一年新高，QE3暫時唔使旨意，有分析仲話會提早加息添。希臘同債主講數成日話「好快」傾掂，但又拖到今個禮拜。

港股上周五已係雞犬皆升格，20大升幅除咗有GO嘅遠東環球（00830）之外，全部都係細價股，部分只係人炒我又炒，部分則的確係估值相當低，所以接連有漢登（00448）、三林（03938）同遠東環球GO或私有化，唔單止細價股執平貨，和黃（00013）亦筍價食奧地利「橙」帶挈埋股價。

藥業股上周五急升，表面上係炒祖國擴大基本藥物制度實施範圍，但實質係追落後居多，古勝早兩個禮拜已話藥股落後，遲到總好過冇到，但喺大升市贏得少已算敗筆。中傳動（00658）發完盈警，低開之後倒升，來回差一成，古勝推介嘅另一風電股金風（02208）亦升6.8%，總之一句落後就照衝可也。

電訊商取消手機無限數據任用，聞樓梯響已久，終於成事，月中開始數碼通（00315）新簽約客戶，不再享有定額任用的數據服務，電訊商以2GB為上限，多用就要多付。電訊商的官方解釋，是防範小部分濫用頻譜，進行大量下載及共享數據用量的用戶，可是用量以2GB設限，將有一成五高用量用戶，成為額外補錢的上貴網一族，比例不算小眾，消息公布後數碼通股價單日抽升一成四，說明精明投資者，看穿「公平使用」的戲法，實際是電訊商變相加價，大家都相信，和電香港（00215）及澳洲Telstra屬下的CSL1010，遲早會有類似行動。

積極搵收購機會

尋日馬拉松件戰衣換咗特步（01368）贊助，劣評如潮，但特步上周五仍勁升9%。安踏（02020）今年搶走倫敦奧運中國代表隊嘅戰衣贊助權，據聞要使4至6億銀。其實體育用品股出高價爭贊助，同兩間收費電視台高價爭英超轉播權一樣，變兩敗俱傷。

水電油氣係民生4大件事，後三者價格已加咗，廣東o依家研究緊階梯水價，加水費相信係遲早嘅事。水股呢排亦算係落後，博中國水務（00855）或北控水務（00371）都唔錯，但個市升到呢個關口，古勝寧願揀防守性較高嘅粵海投資（00270）。粵投喺跌市時一支獨秀，但在升市時反而冇運行，o依家市況調整壓力增加，係時候睇番隻粵投。

呢排「蝗狗爭拗」，內地人振振有辭話供水都要靠佢哋，但香港人年年畀唔少錢粵投賺，年年加價，所以粵投早被視為公用股。而公司似乎亦想開多啲財源，早前用19億人仔買咗塊商業地，另外亦想喺百貨業搵收購機會。粵投一一年PE11倍，其他股呢兩個月升番晒十幾倍PE，粵投又變得抵買。