廣西發生鎘污染食水事件，又一次令人關注內地食水安全問題，尋日幾隻水務股都有唔錯表現，其中以國中控股（00202）最搶鏡，勁升8.8%，至於中國水務（00855）亦升3.4%。
中國水務主要從事城市供水及污水處理業務，截至去年九月底止中期營業額上升38%，但股東應佔溢利減少44%至1.51億元。不過，旗下業務主要集中在湖南、江西等省份，正好受惠於早前湖南上調水價的消息。
集團去年五月以每股3.4元向ORIX發行2.36億股，集資逾8億元，又於七月又獲亞洲開發銀行貸款1億美元，之後隨即收購江西省萍鄉市自來水廠逾五成股權。與此同時，集團亦積極回購股份，按中期報告披露，於去年六至十月期間，增持逾1.28億股，而之後動作亦未有停止，剛過去的一月份，粗略計亦回購了近1,000萬股，對股價提供支持。
中國水務近日持續做好，尋日以全日最高位2.38元報收，咁啱亦係去年十月份高位，再數上去，下一阻力就係舊年八月時的2.7元水平。
詩詩