絲絲講場：飛達利是鋪牆氹夥計返工

好似飛達帽業（01100）老闆顏寶鈴，近年都要想盡辦法氹班員工新年後準時上班，可謂絞盡腦汁，下個新年可能會使出「利誘」嘅新招。

新年尾禡勁疏爽

話說顏寶鈴為咗刺激員工投入工作，尾禡都可謂毫不吝嗇，唔單只有一千蚊人民幣嘅盆菜食，仲有靚酒飲同抽獎，為嘅都係想員工有多啲歸屬感，知道老闆好錫班員工，希望佢哋準時返工，唔好只顧過年。不過好多員工似乎過年大過天，顏寶鈴就話，今年新年開工第一日，得六成五嘅人返工。

積極遷廠孟加拉

有見及此，顏寶鈴就話，出年農曆新年可能要搞搞新意思喇，唔使太多錢喺飲飲食食上面，出年整幅「利是牆」，等過完年早返工嘅員工有機會抽利是，一於利誘員工準時返工。不過為咗公司生產嘅穩定性，飛達帽業早就有將生產線搬去孟加拉嘅計劃，顏寶鈴話希望最快兩年後有五成生產搬到孟加拉。