市場熱線：中國食品快高長大

恒指最多升超過300點，收市升230點，而升市成交亦升到732億元，動力仍然十足，前日跌一跌反而更妙。今日「畢直」唔慌有驚喜，主要睇吓樓市措施有乜依郁，但睇怕會以不變應萬變，亦預咗財爺冇錢派，只係派糖算數。

養老金又再惹憧憬

A股尋日升升跌跌，好在臨尾保住齋缽，但竟然係狂炒ST股（特別板，亦即特別衰），其次係稀土股（世貿剛裁定中國限制出口違例）。養老金入市單嘢像霧又像花，初時講到似層層，過年前有官員否認，近日又有內地報紙吹養老金就快修例泵水入金魚缸，總之孖屐又有憧憬。

最強勢藍籌仍係QQ（00700），率先衝破250日線，但煤氣（00003）同電能（00006）等防守股連升第3日，同屬於防守性嘅收租股亦受追捧，尋日到旺旺（00151）同百麗（01880）等翻身；但火車頭係祖國移動（00941），直撲80蚊關口，喺聯通（00762）同中電信（00728）齊齊「哎瘋」之際，祖國移動升勢冇乜基本因素支持，純粹為咗托市。

內地電力股先跌後升，古勝尋日已分析華能（00902）賺少5成以上係預期之內，低開反而係低吸機會。盈喜同盈警都要對照番之前成績表，鞍鋼（00347）舊年頭三季仍賺2.4億人仔，但全年要蝕21.5億人仔，即係第四季要蝕近24億人仔，鋼鐵股一向都係一啖沙糖一啖屎。

頭20大升幅榜都係細價股，開始禾雀亂飛格，而頭20大跌幅榜則有4隻國企股，講到市值並不對秤，仲有一隻唔少基金落疊嘅億和（00838）呢排亦好似食咗瀉藥咁，而利豐（00494）同李寧（02331）等一抽高就有基金掟貨，所以對個市唔應該期望咁高。

食品股呢排的確偏弱，但中國食品（00506）相對硬淨得多，皆因舊年成績表有保證，上半年已賺多76.5%，四大業務淨得糖果嗰part唔好，而飲酒同飲汽水仍係最大收入來源，證券行普遍係睇好佢嘅紅酒飲得杯落，原因係中食力谷貴價酒，可以拉高毛利率。

貴價紅酒提升收入

投資者或者有個疑問，眾所周知祖國紅酒市場競爭激烈，面對外國紅酒殺到埋身，王朝（00828）同通天（00389）都盈利大跌。但中食同嗰兩間相反，銷量下跌9%，但營業額上升20%，經營溢利更大升81%，皆因貴價酒「長城桑干」同「君頂」銷量急升逾倍。中食已經唔係「土炮」，喺智利同法國買咗酒莊，仲計劃喺美澳西等地收購，打造成一間「全球性酒莊」咁話。

中食同可樂合作嘅飲料業務一向保持穩定增長，而食用油亦因消費者重視食品安全而盈利大升，講增長速度係咁多隻食品股當中最快嗰間，強勢絕對有道理。

古勝