亞洲金融論壇（AFF）一連兩日舉行，最後一日重頭戲係早、午兩場人民幣專題工作坊，下晝演講者之一嘅恒生銀行（00011）副董事長兼行政總裁梁高美懿就話，聽咗成日，相信大家應該聽到死咁滯，淹沒喺人民幣之中，而首次以貝萊德亞太區主席名銜亮相嘅馬凱博（Mark McCombe）就話自己係當日最後一個人民幣講者，即係叫大家忍耐多陣捱埋佢。
今次係Mark無做滙豐香港區總裁後，第一次出席公開場合，返新工只係兩星期就要作為資產管理代表講人民幣，佢都要笑自己只能夠用過往幾年所得經驗同大家分享。
講到Mark，不得不提現任滙豐香港區總裁馮婉眉（Anita）。Anita尋日都有在場演講，題目都係人民幣，不過就同Mark緣慳一面。事關Anita喺朝早講離岸人民幣市場最新發展，Mark就喺下晝先出場，探討人民幣作為資產管理嘅發展路向。