市場傳聞多多，散戶炒消息時一個唔小心，隨時會誤中副車炒錯股。絲絲做過個粗略統計，「誤中副車指數」最高嘅股份，非郭台銘旗下嘅富士康（02038）莫屬。
蘋果公司前日公布供應商名單，入面冇富士康份，股價即急插4.29%，尋日又借外電指Foxconn旗下斯洛伐克工廠裁員600人嘅消息，借故反彈逾4%。不過細心搞清楚，大家就會發覺呢兩個消息，只係關富士康母公司台灣鴻海嘅事，同本港富士康根本完全無關，佢嘅主要客戶係諾基亞至真。絲絲記得之前有好幾單有關蘋果公司嘅新聞，都變作影響富士康嘅因素。
喺斯洛伐克傳出裁員嘅Foxconn英文名，雖然幾乎同本港上市嘅富士康一模一樣，不過這間Foxconn其實係鴻海喺一○年向日本Sony收購嘅LCD電視生產廠房，佢嘅資產同業務，同香港上市嘅富士康根本係風馬牛不相及。
點解股民成日搞亂？股民當然自己要負上最大責任，冇熟讀資料，買唔成「影子股」，變咗買「鬼影股」。郭生間公司都有少少責任嘅，因為鴻海系內有多家公司都用好似樣嘅名稱，搞到股民頭都大晒。