繼今年首個交易日第一次舉行開市儀式後，聽聞港交所喺龍年開市（即年初四）又有新搞作，為咗營造龍年開市熱鬧氣氛，會首次將個銅鑼搬落去交易大堂度敲響，希望龍年經紀個個一本萬利，個個賺到笑，真係意頭十足！
個銅鑼有幾重？由邊個搬落去交易大堂？絲絲就梗係唔知，但敲鑼呢個任務，就梗係由主席夏佳理同埋行政總裁李小加一齊主持喇！
大家都希望龍年開首能打響頭炮，開出紅盤，由舊年到依家，個市陰霾不定，好多經紀都笑唔出，所以趁住龍年到來沖喜一下都好嘅。
平日上市公司畀38,000蚊主持開市儀式，敲銅鑼都喺港交所觀景廊內進行，因為怕影響班出市員工作。之不過，喺龍年首個開市之日，班出市員應該唔介意畀個銅鑼嘈親嘅！
更何況港交所今年好識做，派畀出市員嘅利是今年會加碼，由以往嘅20元加到50元，每20封利是之中，有一封係「加大碼」，有成1,000元「大金牛」添！夏佳理同李小加當日仲會做財神，斷估佢哋都要派成百幾二百封，邊個出市員執到金牛，就好彩喇！依家成日話出市員買少見少，唔知當日出市員人數會唔會突然急增呢？
今年港交所利是封仲零舍唔同添，雖然封面設計同往年一樣，但係紙質就變咗，首次用環保紙及環保墨，即係話成本貴咗啦。港交所員工今年獲派少咗利是封數目，每人只係得50個，港交所真係精打細算。