市場熱線：建行醞釀新升浪

紅色分子焦點所在

A股前幾個月累街坊，但呢兩日變咗財神，而且唔單止出口術咁簡單，神華集團、聯通集團同中石化集團響應溫總號召撐起股市，但前兩者只係買A，而中石化除咗買A外更大手買H，神華同中石化都係買平唔買貴嘅精明消費者，而後者啱啱獲減暴利稅，更要答謝爺恩。

A股尋日再升3%，恒指升0.73%，國指升幅更係恒指嘅兩倍半。龍年未到龍股已翻生，人仔一年期不交收合約由舊年尾溢價800點子，收窄到尋日一度得幾點子，原本「做空中國」嘅都縮番條槓。港股成交激增到575億元，前7位係中資股，前15位只得大笨象（00005）唔係紅色分子，而前4位除咗A50（02823）之外都係內地錢莊股。

呢排孖屐氣氛好，豬扒都變靚女，「美鋁」成績表兩年幾來首度見紅，但股價仍然照升，所以未來放榜期就算增長放緩亦可能炒「好過預期」。TCL通訊（02618）亦升近一成，炒起原因係公司舊年手機銷量增加兩成，達4,361萬部，但實際未能達到舊年初所定嘅5,000萬部目標，十月尾調低目標到4,400萬部亦差少少。

中銀國際尋日出報告話亨得利（03389）同店銷售增長大幅放緩，由賣高檔錶轉賣中檔錶，里昂引述亨得利同東方表行（00398）管理層亦話銷情轉差，東表年尾更見倒退，隻股尋日亦逆市跌2.3%。古勝見個人遊的確愈來愈多人，但豪客是否減少則不得而知。

波羅的海乾散貨指數踏入一二年之後由1,800點急插到1,300點，應咗中國人嗰句「一節淡三墟」，尋日航運股集體回吐，但到內房、水泥、煤炭、飛機翻生，兩隻「龍B」概念股好孩子（01086）同青蛙王子（01259）齊齊上榜。

內銀估值低無可低

內銀股尋日成交勁升，但股價升得唔算多。有消息話一月新增貸款會突破1萬億人仔，一月過咗未夠一半就已報喜，皆因上月下半月已有放水迹象，人行早前已話春節前都唔會發央行票據，相當於放水500億人仔，雖然同減一次存款準備金率（RRR）放水3,000億人仔差好多倍，但減RRR亦係遲早嘅事。

舊年加咗咁多次RRR，內銀股舊年仍預計平均可賺多三成。今年坊間普遍預測會減4至6次RRR，錢莊無論存款同貸款都會手鬆好多，今年新增貸款保守估計會增至8.5萬億人仔。不過，內銀股今年盈利增長可能會減慢到一成幾，但比較本地錢莊增長得8%左右已好好多，而且一一年PE得7倍，一二年再降到6倍，實在低無可低。

古勝舊年尾已睇好內銀股，先後推介過工行（01398）同農行（01288），四大行最落後係建行（00939），「散戶愛股」幾時都係差啲，但四大行既然拍住上，建行起步較慢，但好快亦會跟上。

古勝