舊年A股唔多靚仔，股民輸得甘，唯獨係新股市場，仲可以造就神話。有內地嘅媒體做咗個統計，舊年上市新股共造就咗558名億萬富翁，數字雖然比二○一○年新股造就800多名億萬富翁數量有所下降，但已經羨慕死人。
舊年上市嘅新股有282隻，前十大股東中包含1,337名個人股東。按照去年底收市價計算，市值過億嘅有558名，比亞迪總裁王傳福以130億元（人民幣‧下同）嘅持股市值居首。
比亞迪嘅A股上市之後，股價雖然麻麻地，年底時嘅價較上市之初下跌3成，但冇影響王傳福成為A股市場新股首富嘅地位。
王傳福係比亞迪嘅總裁，揸住5.7億股A股。持股市值位居第二嘅新進富翁亦都嚟自比亞迪，此人就係副董事長呂向陽，佢持有2.39億股股份，年底持股市值達到54.5億元。
居於第三位嘅，係大智慧嘅董事長兼總經理張長虹，持股價值約42億元。持股市值超過30億元嘅新股富翁還有龐大集團董事長龐慶華、內蒙君正董事長杜江濤、東富龍董事長鄭效東、以嶺藥業董事吳相君、海能達董事長陳清州等。