絲絲講場：陶偉邦接掌港澳區VISA
尋日VISA公布咗個幾出人意表嘅人事任命，就係委任陶偉邦（Thomas Tobin）做香港及澳門地區總經理。事關陶偉邦就係滙豐越南前行政總裁及主管，喺滙豐工作咗超過20年之餘，派駐過新加坡、汶萊等地，又做過滙豐銀行香港總行經理，相信對香港業務應該唔會陌生。
其實VISA香港及澳門地區總經理個位已經懸空咗差不多一年。自從已過檔八達通做行政總裁嘅張耀堂（Sunny）離任之後，一路都係辛瑋達（Corbin）做署理總經理，依家有陶偉邦加盟，Corbin就繼續火箭式高升之旅，出任Visa北亞地區商戶收單業務副總經理。
親自湊大滙豐越南
話說回來，VISA呢個位都真係幾鍾意請銀行界人士，陶偉邦一手一腳湊大滙豐越南，固之然令人印象深刻。喺○九年，VISA就搵咗同樣喺銀行界工作超過廿年嘅Sunny過檔。嚟緊陶偉邦將會喺下個月上任，唔知到時佢有乜鴻圖大計呢？