絲絲講場：中電「新總部」前身酒樓
中電（00002）喺亞皆老街嘅總部，舊年十一月獲批重建，既然要重建，喺呢個物業返工嘅員工固然要搬竇。據講，改建緊嘅紅磡漁人碼頭，部分樓面已經預咗畀中電用，改建速度應該可以趕得切中電嘅需要。
多個辦公室集合運作
自從中電話要重建總部後，絲絲嘅地產老友，一早就「吼」住個進度，睇吓有冇得提供專業「服務」，點知最後落戶漁人碼頭。
紅磡漁人碼頭部分商場樓面改建嘅新Office，有傳只係總部搬遷嘅第一步。中電公關同絲絲講，紅磡漁人碼頭設立新辦公室，目的係將目前分散喺多個唔同地點辦公嘅同事，集合埋喺同一Office內，不過實際遷入新Office嘅部門，就暫時仍未有定案。
紅磡漁人碼頭坐落喺海逸豪園，發展商係長實（00001），呢個盤中電有份參與，既然合作開，留番啲商場樓面畀中電，做法好正常。商場重建計劃早就喺舊年四月曝光，而中電新Office部分樓面，就係「海逸皇宮大酒樓」嘅舊址，依家間酒樓就已經搬遷到商場嘅其他樓層營業。絲絲做廠嘅老友話，好懷念「海逸皇宮大酒樓」仲喺度嘅日子，皆因依家好少酒樓可以擺到五十圍以上。紅磡區有好多廠佬，最鍾意喺度搞春茗，又有個好大嘅舞台，熱鬧非常，依家都唔知去邊度搵咁大間酒樓搞春茗至好喇。