市場熱線：中化肥收購壯規模

升穿百日線有睇頭

內地十二月M2增長反彈，十二月存款同貸款增長亦好過預期，變咗過年前減RRR機會降低，A股早段反應係下跌，但A股不嬲如無定向風，有人話溫總只係出口術，佢嗰「5項堅持，8項部署」其實冇新意，溫總把口已係「提振信心」嘅保證，但亦有人解釋話為養老金入市鋪路，養老金買股似乎幾大爭議，不過祖國有啲嘢先放風然後講講吓就變真。不過，真真假假好難捉，如果淨睇經濟面沽之而後快，隨時會被救市措施或出口術教訓。

老美同老歐一個天堂、一個地獄，歐洲又好似大難臨頭，希臘改革闊佬懶理隨時失救，匈牙利亦可能變成「凶」牙利，周四、五又到鬥牛國同意粉國賣債。尋晚「美女」揭開花旗放榜期序幕，但「美女」隨時變醜女，上季美企盈利增長估計得單位數字。話利淡的確有利淡因素，但跌得多就會借啲消息反彈。

恒指收報18,865點，差兩點未上到100日平均線，呢條線自從舊年下半年就好似「五指山」咁樣壓住港股，但以值博率計算，升穿就相當和味。當個市有波幅，股票同期指成交自然增加。朝早好多股弱過藥煲，連早前強勢嘅電訊股同電訊設備股都洗埋倉，真係好嘅唔靈醜嘅靈。

傳聞CDMA版「哎瘋」就快出世，點知中電信（00728）反而跌到四腳朝天，京信通信（02342）一度跌一成幾，中興（00763）曾跌1蚊，但以上幾隻股收市全部跌幅大為收窄。比較差嘅係公路股，新一年好多條公路都宣布要減價。

表現好嘅股亦唔少，聯想（00992）有大摩唱好，一拖（00038）落實發A股，大成生化（00809）同金界（03918）發盈喜，煤炭股亦跟住A股升，內銀股炒十二月貸款增長，內房股同水泥股跌得多有反彈。

買磷礦增收入來源

中化化肥（00297）朝早停牌，中午宣布用13.8億人仔收購磷礦資產，下晝復牌升2.4%。真正農業股冇人理，但間接受惠股反而仲好炒，因為農業好景自然會用多啲拖拉機同肥田料，肥料主要分為氮、磷、鉀3種，氮肥主要係中海石化（03983）生產嘅尿素，而氮同鉀屬於礦產，內地鉀肥大部分要靠入口，中化肥亦主要以分銷搵錢，今次買磷礦可以分散收入來源，成為一間更多元化嘅化肥股。

磷礦位於雲南省，產能30萬噸，獨立估值師評估值13.3億人仔，截至舊年九月底淨資產2.2億人仔，一○年賺3,900萬人仔，一一年首3季賺1,800萬人仔，睇條數好似唔多吸引，但磷礦已批准改擴建，應該可以為中化肥帶來合理收益。中化肥股價喺兩蚊見底，每年盈利都幾波動，但現價較每股資產淨值有小小折讓，計落都有唔錯值博率。