內銀近年為咗提高董事局管治水平，不斷請猛人入局，除咗香港前監管機構同政府高官之外，大型銀行舵手都成為招賢納士之選，工行（01398）董事局已經有前財爺梁錦松做獨立非執董，尋日就再宣布，委任前恒生銀行（00011）副董事長兼行政總裁柯清輝做獨立非執行董事。
柯大俠離開恒生後，其實一直未離開財金界，依家仲做緊中策（00235）嘅CEO，其實柯大俠喺恒生掌舵時，無賣過雷曼迷債等結構性產品畀散戶，審慎作風令唔少行家拍爛手掌，以審慎著稱嘅工行請佢入局，應該幾合拍。