絲絲講場：建行亞洲專屬酒標搶眼

訂紅酒送禮過節

絲絲聽講呢批紅酒係二○○九年嘅佳釀，過去兩年喺好幾個葡萄酒大賽都得過獎，而且由Merlot同Cabernet Sauvignon兩種葡萄釀製，果香濃得嚟好易入口，啱晒過節時候飲用，聽講建行亞洲趁年尾舉辦啲商業活動，順勢送畀合作夥伴，反應認真唔錯。

其實聖誕節同埋農曆新年傳統顏色都係紅色，建行亞洲話送紅酒，就係咁啱可以襯番個酒紅色聖誕節，不過絲絲睇佢哋個特製酒標，紅色以外都係唔少得建行（00939）嘅藍色主色，十分搶眼。

唔單止紅酒，建行亞洲送座檯月曆都好有個性，皆因佢哋今年送畀朋友，每一版月曆都會印對方個名喺上面，絲絲收到嗰個都唔例外，以後唔使怕睇錯同事月曆啦。