絲絲講場：保誠韓偉民引退 多揣測
作為一個領袖，做每個決定都要非常小心，好似舊年英國保誠（02378）收購友邦保險（01299）以失敗告終，就搞到保誠使多咗3.7億英鎊，更令到唔少保誠股東對主席韓偉民（Harvey McGrath）同行政總裁譚天忠非常不滿，日前韓偉民終於決定做埋今年，出年就辭去主席一職。
雖然已事隔年半，但有唔少人都會推測，今次韓偉民求去會唔會同收購觸礁一事有關。韓偉民就話佢一直都參與多啲其他活動，例如公共範疇、教育界同慈善界，但奈何保誠主席一職事務繁重，需要人全情投入，所以不得已要辭去主席職位。
不忘誇獎戰友譚天忠
咁事件另一主角譚天忠呢？韓偉民臨走都要讚吓佢，話以譚天忠嘅才幹，加上董事會嘅協助，足以推動保誠嘅業務有長足發展。無可否認，近兩年保誠嘅業務表現相當唔錯，但作為韓偉民愛將嘅譚天忠會唔會無得留低，或者奪得董事會新班子嘅歡心，就真係要耐心觀察。