市場熱線：旺旺買得夠安心

中美經濟風向又轉

滬綜指不濟賴晒隻發A股可換股債嘅平保（02318），但平保A股朝早升過一陣，到收市卻暴跌5.2%，H股跌幅則少一半。照計發CB唔應該咁大影響，CB持有人會減持股票減低風險，而暫時未知換股價係幾多，所以假如發新A股嘅攤薄因素亦比較難計算，但H股比A股貴21.6%，有得揀梗係買A股。

A股一路捱打，「強輸金」今年如果揀美股基金原來唔使輸。事實歸事實，中美呢排嘅經濟數據冇得比，水向西流亦正路。隔晚花旗新屋動工飆升，就業同房屋係花旗兩大死穴，最近卻有打通任督二脈迹象。歐債如果真係有起色，年尾隨時標尾會。

港股成交得414億元，雖然話係乾升，但長假前夕不能苛求，大笨象（00005）同聯通（00762）都有好消息，齊升2.5%，聯通3G減價搶客成功，但被搶客嘅中電信（00728）則要逆市下跌。昆能（00135）搞咗一年，終於獲批准唧入北京燃氣，隻股次次跌到10蚊就反彈，前日最低9.99元，依足策略話咁快執一成。

個市氣氛好番啲，但基金股仍輪流被洗倉，尋日輪到三一（00631）。隻京能（00579）公開發售得5球幾認購，已經同創業板上市冇分別，但近排上正板嘅新股冇隻可以重返家鄉。

香港又發雞瘟，唔知會唔會傳染去內地，天氣愈凍愈有利病菌傳播。做雞肉嘅康大（00834）同森寶（01089）分別跌4.4%同平收，最得益係雨潤（01068），間公司呢排創先河搞埋網上團購，話1日內賣咗7噸豬肉。依家噏得出嘅嘢都可以喺網上買，懶人連出街都慳番。

年年增長確係難得

食品股的確係有一定風險，但優點則係唔食唔得，就算金融風暴海嘯地震都唔驚，兩隻染藍食品股──康師傅（00322）同旺旺（00151）年年收入同股價都有增長，康師傅今年股價升咗兩成，旺旺亦升咗17%，出年表現冇水晶球，但揸住做長線投資起碼可以抗通脹。

就算今年頭三季內地原材料價格上升兼限價影響盈利，但食品股表現亦有板有眼，到依家通脹回落，一來阿爺鬆手准加價（只要唔好咁離譜），二來製造食品嘅原材料來價下降，以旺旺為例，奶粉成本平咗，包裝成本亦下降，對毛利率回升肯定有所幫助。

旺旺染藍首日創咗新高，然後有唔少獲利盤同投機盤出貨，但股價調整到7.5元已見支持，條上升通道仍好暢順，高處未算高，有心買仍未怕遲。

古勝