呢排新股密密出擊，之前有周大福（01929），跟住又即將嚟個必瘦站（01830）。必瘦站即將上市，大家可以參考嘅資料唔多，不過見到佘詩曼同傅穎近年做佢代言人，之前又有郭可盈、蔡少芬同廖碧兒等等，大家都想睇吓間嘢有幾大來頭，係咪？
睇番必瘦站嘅招股文件，公司平均每年用130萬聘請佘詩曼，兩年合共260萬元；至於郭可盈、蔡少芬同廖碧兒嘅代言人總費用係380萬元，位位身價都過百萬。至於近年負面消息比較多嘅傅穎，○九年代言人費用竟然係零，呢樣嘢Prof. J就覺得有點兒奇怪。
必瘦站○九年收到過百宗由消委會提出嘅投訴，一○年就收到74宗，總額約840萬元。公司願意賠償，因自己品牌緊要。集團亦承認自己有被客戶投訴，主要可能因為產品推銷手法方面過硬，不過投訴嘅客戶只佔公司嘅活躍會員總數0.03至0.47%，呢個數目又唔算多。佔活躍會員數0.5%唔夠，咁佔總會員數就自然更少啦。
公司集資目的，主要想開拓內地纖體市場；公司計劃喺一五年三月前，喺內地起多106間新服務中心，其中78間喺一線城市。照咁睇嚟內地市場會員都幾多，發展空間唔細。集團集資額介乎2億至4億元，大概喺月中招股月底掛牌，大家密切留意！
香港大學電子金融服務榮譽助理教授徐燦傑