絲絲講場：美打工仔為飯碗 願減假扣花紅
近排市況欠佳，歐美唔少大行喺聖誕前後都會有裁員行動。面對愁雲慘霧嘅就業市場，打工仔點無奈都要接受現實。
美國人力資源公司Randstad近日進行一項調查，發現受訪打工仔為保住自己飯碗，唔少人都願意接受減花紅、減福利甚至唔放假OT工作，就連減薪都有16%的被訪者都話會無奈咁接受！
2/3人肯同老闆共度時艱
調查訪問咗3,022名美國打工仔，當中各有24%受訪者話為保住飯碗，願意減花紅同無償開OT，23%話願意削減福利、22%就話減年假都可以接受，扣除同時選擇多於一項的因素，大大話話有三分二的受訪打工仔，願意以減花紅、唔放假等同老闆共度時艱。
面對減福利、減花紅等控制成本措施，Randstad亦提醒打工仔，唔好以為肯蝕底，就可以保住自己份工，更重要嘅係保持對工作嘅熱誠同唔怕蝕底，為公司做多啲事，事關當老闆注意你嘅價值時，公司不但唔捨得炒你，老闆甚至可能暗啞抵唔使你減人工添。