中銀監前任主席劉明康退下火線後，曾經透露得閒就整理吓畫作、湊孫為樂，不知幾享受退休嘅生活。但根據最新消息，劉明康已經確定加入杏壇，為內地作育英才，過完年之後就會去教書嘞。
能夠請得郁劉明康嘅就係中山大學，佢仲已經正式受聘做教授，同時擔任中山大學嶺南學院嘅名譽院長添。由明年春季開始，佢會喺大學向學生傳授有關國際金融監管嘅知識。先後喺國家開發銀行、人民銀行同中銀監等機構擔任要職多年，劉明康擁有豐富嘅監管經驗，能夠傳承薪火梗係好喇。
劉明康上個禮拜曾經去中山大學演講，分析吓當前嘅經濟形勢。佢講明美國嘅銀行危機仲未解決，一定會捲土重來，加埋歐債危機，全球嘅局勢仲會惡化，而且發展中國家冇可能可以置身事外。但係佢都睇好發展中國家喺未來五年對全球GDP增長嘅貢獻度一定會提高。中山大學嘅景色唔錯，生活一向好有情調嘅劉明康，話唔定會喺校園取景寫生添。
余絲韻