市場熱線：中石油低位儲貨

唔止歐豬累街坊，滬綜指卒之跌穿2,300點，以前大凡阿爺開親國策大會，A股例必炒吓助興，今次完全冇呢支歌仔唱，深滬成交加埋得700億人仔，呢個成交量難怪海通證券要打退堂鼓，中信証券（06030）亦跌4.3%。地產水泥股跌得較傷，皆因政治局會議對樓價並冇鬆手，但本港上市內房股反而幾硬淨。

單日轉向氣氛偏淡

經過尋日咁樣單日轉向，孖屐氣氛當堂轉向悲觀，恒指朝早最多升超過300點，但到下晝A股跌穿2,300點之後，港股亦跟住升幅全部蒸發，埋單恒指微跌10點，成交得444億元，期指臨尾低水86點。成交低係聖誕前嘅例牌菜，後市要睇住會唔會跌穿18,300點附近之上升軌，同埋歐債孳息是否續升，皆因歐洲救市方法已經愈用愈少。今晚聯儲局議息，主題係「無題」，只係等個會後聲明有乜嘢噏。

人和（01387）連跌第3日，瑞銀報告話公司要為筆應收帳撥備13億人仔，仲要將公司目標價大降到8毫子，又話有抵押擔保？人和上市後頻頻有大行唱好，話佢資產折讓大，睇佢股東陣容，除咗大股東秀麗‧好肯之外，仲有劉央、細摩、Capital Group、Norges Bank均揸5%以上。

海通證券傳臨門撻Q，天瑞水泥即刻叫停，OTO（06880）今日熱爆登場，但古勝奉勸賺餐茶就算數。而京潔能源（00579）同中國織材（03778）頂硬上開始招親，兩隻都冇乜概念，但愈少人幫襯反而愈有冷味。京潔係捲土重來，尋日部分風電股逆市上升，據稱係蓋茨有意投資中國核電單消息所帶挈，中核（02302）更大升17%，其實單消息喺蓋茨率領基金會上周初訪華前已通天，但好多人走漏眼。

原油始終無可取替

古勝近期對石油股較為睇好，上個禮拜推介嘅中海油（00883）就快到14.5元嘅建議買入價，而中石油（00857）係另一隻可注意對象。油價比較奇怪，照計如果全球經濟衰退，石油應係其中一樣最受影響商品，但期油雖然近日跌穿100美金，不過硬淨程度仍然緊隨黃金，除咗驚伊朗發展核武器或會被國際制裁之外，石油日漸減少，需求依然旺盛，美國同中國汽車銷量亦不斷上升。

據聞發展潔淨同廉宜能源係蓋茨畢生三大志願之一，但點解要揀同中國合作要問佢至知，喺佢祖家美國要發展核電有好多顧忌，依家德國同日本亦加入反核行列，所以石油仍係不可取代能源。至於祖國石油石化股有兩個短線可憧憬因素，一個係成品油定價機制改革，一個係調低石油暴利稅，最近傳到好「行」會將徵收門檻提高到每桶50美金，有傳係55美金。雖然兩個消息都傳咗N年，但有時傳傳吓就成事。

古勝