Smart Money:上市公司盤數要睇清

個人要財務健康,盡量減低負債;上市公司嘅財務健康同樣重要,以近排多隻趕上市新股為例,投資者其實拎起本厚過鐵板嘅招股書,又或者平時搵幾間上市公司嘅財務報告嚟研究,都會入咗迷魂陣——唔知佢講乜。萬幾字嘅財務報告,根本唔知邊條數要睇,邊條數唔使睇,結果大家多數用一堆財務比率嚟計吓計吓,然後搵一兩隻股投資。

今時今日行走江湖,大家都要識多一兩道「散手」。首先,一間公司由資產、負債及資本構成。會計學公式第一條:資產=負債+資本。一間公司可以有價值5億元嘅廠房,但係有2.5億元係問銀行借嘅,條公式就變成:5億 (資產)=2.5億(負債)+2.5億(資本)。同樣,大家睇落去以為一間公司市值幾百億好勁,有冇問過間公司到底借咗幾多錢?

公司借嘅錢,又分長錢同短錢。短錢,係一年左右就要還清嘅數;長錢,係指多於一年嘅欠款。短錢你唔還,即時畀人申請清盤。有一種方法,就係問銀行借長錢,去還咗堆短債。長錢嘅特點,第一係分期付息,第二係還款期較長——你一日供得起,人哋都唔會叫你清盤。

了解資產長短錢分布

大家睇一間公司嘅財務健康狀況,就要問三個問題。第一,佢有幾多資產;第二,佢借咗幾多短錢;第三,佢借咗幾多長錢。有咗呢三個問題,大概對公司嘅規模有個概念。首先,總負債嘅水平(長債+短債)一定唔可以太高;其次,短債嘅水平,要盡量減到有咁少得咁少。

點為之太高?財務學嚟講冇標準!高負債公司,借番嚟嘅錢有一定利息,如果呢批錢可以獲取比利息更高嘅回報,呢間公司唔會有問題。所以會計學裏面,我哋會將利息成本同公司淨收入作一個比較,一般我哋都要求公司淨收入「大幅」超過利息成本,如果唔係你不如唔好借。

大家要睇吓間公司借錢抵唔抵,即時睇資產回報率(ROA)同埋股東權益報酬率 (ROE) 即可!財務槓桿指數即係 ROE 除以 ROA,如果比率大於1,舉債有利;反之,比率小於1,唔借好過借。呢條公式,ROA即係資產回報率,係冇計入負債嘅;ROE即係股東回報率,係計埋負債嘅。ROE除以ROA,如果大過1,即係公司借完債之後個回報仲好,咁當然借得多獲利更多啦!

唔同行業有唔同嘅借債水平,其中科研公司借債水平會較高,因要掟錢做研究。上市公司有時會買股買債,不過呢個舉動只係將公司嘅現金變為另一種資產。股同債我哋界定為長期資產,唔會假設間公司炒炒賣賣。當流動現金變為固定資產時,會令公司嘅流動水平下降,亦即短期償債能力減弱,稍為增加經營風險。

香港大學電子金融服務榮譽助理教授 徐燦傑

地產網大革新,即睇最新樓價走勢、最全面地產新聞及筍盤情報!

「Money18免費即秒股票報價網站」現推出8升級功能,財經資訊,實時實發!