孖妹缸湖遊：鍾秀霞同你搵明日之升

上星期四港股一下就「chok」上萬九點，確實大快人心。祺祺等咗咁耐，終於都賺番筆，即刻相約高妹去shopping，入吓啲新款冬裝氹自己開心！不過，孖妹會唔會開心得太早，個市喺呢半年嚟都經常「chok」上「chok」落。諗諗吓，都係有啲擔心後市，為咗自己嘅置裝費，即刻約埋基金界淑女出嚟，一路行街一路傾吓個後市市況。

鍾秀霞

鍾秀霞（Christina）喺基金界享負盛名，佢係德盛安聯旗下研富資產管理（RCM）高級基金經理，管理逾28億美元（逾218億港元）資產，主要投資大中華地區。今次孖妹難得約到Christina出來shopping，當然要問吓佢對港股後市嘅睇法，再請教吓投資心得啦！

鍾：鍾秀霞

放大圖片

放大圖片

祺祺：環球經濟動盪，拖累股市表現大幅下跌，恒指年內更跌咗17.34%，點樣揀股先輸少啲呀？

　鍾：由於全球經濟正逐步放緩，即使中國亦難幸免，所以我會選擇一啲與經濟聯繫較小的行業，好似工業類別就較少受到經濟衝擊，另外我亦會關注同中國政策及消費有關嘅公司。隨住早前嘅大跌市，投資者均紛紛沽貨離場，但忘記咗公司嘅潛在價值，唔少中小企股份嘅估值已跌到一個相當低嘅水平，反而提供咗趁低吸納嘅時機。

高妹：恒指表現忽高忽低，反映環球股市陰霾依然存在。咁嘅市況下，係咪投資龍頭股會穩陣啲？

　鍾：喺呢個喜怒無常嘅市況下，龍頭股無疑係避險之選，但大家都要睇埋個估值，亦要衡量其股價上升空間。不過，由於投資者均視龍頭股為避難所，若市場嘅恐慌情緒稍為減退，市場轉趨穩定嘅時候，睇落安全嘅股份反而會帶嚟風險，投資者宜平衡各方因素。

基金入貨睇中長線

祺祺：你管理嘅基金表現一直處於基金排行榜上游位置，你有咩心得o架？

　鍾：我哋睇股票以中長線因素為主，唔會盲目跟隨市場波動而入市。我哋會做唔同嘅研究分析，以發掘出具潛力而又被市場忽略嘅股份。喺亂世下，最大滿足感係可以搵到「明日之升」。過去亦有唔少「明日之升」嘅例子，給予嘅回報並唔只十幾廿幾個巴仙，而係一至兩倍呢！哈哈，所以如果能發掘出「明日之升」，對整個組合嘅回報的確有好大幫助呀。

高妹：金融世界包羅萬象，你點搵「明日之升」o架？

　鍾：其實大部分嘅「明日之升」並唔係嚟自新公司，而係以前跟過，但被遺忘咗嘅公司嚟嘅。我會翻閱自己跟過嘅公司，因為金融市場喺每段時間都有唔同嘅潮流，當呢個潮流興起時，投資者就會將股價推到好高，但過咗氣之後，股價就會大幅滑落。但係呢啲公司可能有實質條件同盈利支持，所以再翻看其細節時，便會有驚喜。而且我哋亦會做很多草根研究，例如當售貨員指出銷售生意好好嘅時候，公司調查員就會親自到店舖內觀察，再寫報告，分析實際現象。我哋就再從中找尋方向，發掘具潛力的公司。此外，做我哋呢一行，反方向及前瞻性思維都好重要。所以我會常常與行內人士傾偈，聽吓各方人士的意見，先可以進一步了解市場趨勢，發掘出「明日之升」。

祺祺：又到年尾，市場成日話基金經理會喺呢個時候粉飾櫥窗，究竟有無呢回事o架？我哋呢啲小散戶可唔可以藉住粉飾櫥窗一事，趁機炒吓呀？

　鍾：粉飾櫥窗屬個別情況，但太技術性啦，我好少會專登去留意，寧願放多啲時間去了解唔同公司嘅動向。當然，若果我所持有嘅股份能受惠於粉飾櫥窗，我都樂於坐享其成嘅，哈哈！不過，市場上存在太多因素同消息，當中孰真孰假，確實難以分辨，亦難以預測市況。因此應多了解行業同公司嘅背景資料，先唔會受外圍經濟左右呀！

祺祺：你認為年底嘅港股表現如何，會否藉住粉飾櫥窗而做好？

　鍾：今年港股反覆不定，恒指喺十月四日大幅下瀉至16,250點，市場出現超賣狀況，只要外圍經濟稍稍轉穩，就能隨即作出反彈。粉飾櫥窗嘅因素難以預料，但我認為今年年尾嘅股價應該唔會再大插水o架啦，當然係基於無重大因素出現，若果歐元瓦解或者推出資金控制等政策，則另當別論嘅。不過，縱使外圍經濟續現隱憂，中國仍有唔少利好因素，投資者可將焦點轉移至內地市場。