市場熱線：中海油逢低收集

美元掉期協議調低，係咪可以解決歐豬國財赤惡化，歐洲部分政府資不抵債問題？答案顯易而見，六大央行仲選擇去做，反映他們看到幾個歐豬債息繼續攀升的嚴重性，意大利如果繼續用7至8厘發債，冚3至4厘到期舊債，等於同大耳窿借錢還信用卡數一樣，玩玩吓隨時連還息都有困難，歐洲銀行最後又必定遭殃。然而，EFSF、歐元共同債券、甚至德法提出更嚴格要成員國削減預算的提議，統統只聞樓梯響，惟任何恢復市場信心的措施，即使治標不治本，都要試試，但除非上面三個較可行的方案都得到歐盟成員全部開綠燈，否則，中長線仲係難以令人安心。

祖國股市獨憔悴

康師傅（00322）同旺旺（00151）唔似班MSCI新貴咁失禮，上周五倒升收市，不過沽空分別佔總成交53.35%同41.77%，令人懷疑班空軍喺尾市擺晒沽空盤，等班芬佬去掃貨，到今個禮拜兩隻股由高位回落時就可以施施然食胡。

濠賭股同零售股分別公布完十一月同十月數據之後都受壓，反而啤酒股喺淡季卻特別標青，青啤（00168）上升4.6%，華創（00291）亦升3.7%。上個禮拜外圍興合合，但A股仍要連跌4個禮拜，連減RRR都刺激唔大，年尾會較為水緊，所以上月新增貸款唔過5,000億人仔亦唔出奇。

內房股上個禮拜炒得瘋狂，有幾隻升咗兩成以上，但其中一個幻想破滅，限購令已經通知咗出年會延續。新年有好多新政策，舊年《一號文件》搞水利，水股炒過一輪，聽講今年仍係以農業為先，傳聞焦點會放喺農業科技改革，即係現代種植、養殖、農產品加工同農機裝備等，古勝上周四推介嘅一拖（00038）食正條水，上周五再升逾5%。科技種植目的係增產，增產則令農產品降價，唔使再被農產品拉高通脹。

至於中電信（00728）同埋聯通（00762）亦承諾寬頻減價，以中止對佢哋嘅反壟斷調查，中電信5年內會減價35%，而聯通暫時未決定減幾多，但唔多唔少都會對兩間公司股價有影響。其實大把國企涉及壟斷，例如三大航空公司壟斷航線，中航信（00696）壟斷機票生意，又唔見阿爺出聲？甚至鼓勵兼併重組寡頭經營。

三大石油公司亦壟斷咗祖國能源業，買中海油（00883）比較簡單，唔使理下游成品油價格走勢。講到油價，升穿100美金之後未見回頭，如果伊朗核危機升級搞到石油禁運嘅話，油價更加想跌都難，所以油股短期比金股更值得睇好。

深海勘探有錢途

中海油前排中止收購PAE，但啱啱完成收購油砂公司OPTI單刁，仲同新合作夥伴Nexen買入幾個墨西哥灣深海勘探井股權。深海勘探嘅技術已經提高，令到採油成本降低，如果油價繼續高企嘅話，深海探油相當有「錢」途。

中海油前排發生渤海灣油田事故，跟住無端端有領導層變動，但呢兩單嘢已煙消雲散，上周四更一支箭咁飆升，所以上周五略為回吐，16蚊好似有幾大阻力，但如果認為國際油價已踏上不歸路，不妨等隻股回落到14.5元左右再捧場。

古勝