近排聽好多有關響大陸「好心無好報事件」，居然要從最低嘅道德標準，重新思索人性同現實嘅問題，絲絲同個賓卡老友講開，問佢成日返大陸傾「刁」，有無畀人老屈，答案係肯定嘅。
話說老友成日出差上大陸，有好多空檔時間，佢鍾意去當地市場淘寶，同埋睇吓唔同地方嘅風土人情。話說佢先兩個月去咗江西傾單生意，夜晚打的去當地一個夜市，當佢推開道的士門落車，就發現地下有個婆婆坐咗響度，當時環境好黑，老友自己都唔肯定係咪撞倒人，即刻撲埋去扶佢，無幾耐就有兩個「見義勇為」嘅青年上前，為婆婆打不平。
結果兩個青年伸手要十張一百蚊紙，話扶阿婆去睇醫生，老友嗰時已經知道上當，但係都循例講吓價，結果畀咗八舊水，佢笑笑口咁話，跑咗大江南北都有十年，咩都見過，估唔到咁樣失手。絲絲笑佢，你國語咁鬼普通，戴住副名牌金絲眼鏡，係人都知你有米，屈錢仲打八折，咪算你好彩囉。
但老友語重心長咁話，如果唔扶個婆婆，佢可能一世唔安樂，每個人嘅道德價值高低不同，呢八百蚊，佢仲畀得起。
余絲韻