絲絲講場：中移王建宙5手機隨身
正所謂知己知彼，先可以百戰百勝，中移（00941）董事長王建宙肯定深明此道。他尋日自爆身上常備五部手機，隨時隨地測試中移的網絡質素，他又透露，自己最期望亞洲能夠成長出自己的喬布斯，在移動互聯網的世界闖出一片天空。
時刻可測試網絡質量
王建宙尋日喺大連出席夏季達沃斯年會演講時，自爆隨身帶住五部手機，而且長期維持開機狀態。手機對他嚟講，不單只係用來通話，而且亦可測試中移網絡嘅上網質量。佢又話亞洲人好鍾意用手機玩遊戲，同其他地區好唔同。大家可能會問，點解要用上五部手機來測試網絡質量，王建宙雖然無解釋，但大家只要了解到，中移目前分別營運GSM 2G及TD3G，聯通（00762）分別營運GSM 2G及歐式3G、中電信（00728）就營運CDMA美式3G，相信可以估到王建宙點解要用五部手機來測試網絡！
冀亞洲孕育新喬布斯
當然大家比較關心嘅係中移幾時會有iPhone賣，但佢重申，仍同對方洽商緊，未有新消息，但講開一手推進iPhone革命嘅喬布斯，王建宙就話佢最期望係亞洲能夠孕育出另一位「喬布斯」，並指內地及亞洲有非常龐大嘅市場需求，亞洲絕對有足夠資金帶動移動互聯網產業嘅成長。
余絲韻