忙到冇停手，不斷巡視國情嘅同時，不忘睇吓周圍環境，發覺同胞們身旁不乏珠寶首飾，金舖生意真係旺到你唔信。見到繁忙地段，好似旺角等地方，竟然可以有幾間金舖開喺地下，咁惡租都頂得住，咪話唔叻。
六福集團（00590）咁強勢，因為不愁冇人買金是也。公司主席都講咗，佢哋獲利來源主要來自香港市場，佔總收入七成以上。有人話呢類公司危險到反艇，皆因香港業務停低，就真係企咗喺度。但係睇番呢幾年，內地個人遊令同胞門不斷來港消費，零售業靠呢條水又真係撐起半邊天，唔到你唔服。
點解同胞們唔喺內地買金，走落嚟香港買？咁又要問一句，點解奶粉價錢香港可以有溢價。食咗會頭大嘅奶粉邊個敢買？造假情況咁嚴重，連人仔都有得假，你話大拿拿九九金，畀你揀會去邊度買？所以呢幾年六福股價飛天，根本就係意料中事。
睇番數據，集團由○七年到現在，生意愈做愈大，純利有增無減。單以一一年業績，就上升了63%，平均每年都有幾成增長。試問租貴人工貴嘅今天，有咩行業可以打出一個咁標青嘅業績。大概20倍市盈率，反映咗呢隻股票嘅高增長前景。雖然股價由以前3蚊升到依家33.35元，但係息率都仲有近2厘，咪話唔勁。你歐債有危機，我就揸住金銀珠寶睇你點行！繼續追蹤、出發！
香港大學電子金融服務榮譽助理教授 徐燦傑