絲絲講場：卓越僱主誰可擔當
三一重工董事長呢排真係鴻運當頭，早排至榮登胡潤中國百富榜榜首寶座，尋日《財富》雜誌（中文版）有份做嘅二○一一年「卓越僱主──中國最適宜工作的公司」排行榜，三一都入圍，個榜入面仲有好多熟悉嘅名字，包括小肥羊、蘇寧電器、沃爾瑪（中國）、路易威登中國。
出錢送員工出國培訓
今年上榜嘅20家企業中，三一重工、京東商城、路易威登、傑尼亞、東風日產等14間企業都喺第一次獲選。調查話員工嘅敬業度係評選嘅唯一標準，而呢啲入榜嘅好公司都有共通點，唔單只有透明嘅管理制度，而且喺留住同培養人才方面十分出力，佢哋員工嘅歸屬感及認同感仲好強添。好似東風日產就出錢打造住宅小區，以成本價賣畀員工，三一重工就喺公司嘅製造及工藝體系中挑選有潛力嘅員工，送到世界頂級大學培訓。
呢個排行榜，喺《財富》同韜睿惠悅合作進行，由二○○三年起每兩年公布一次入選名單。要登上呢個榜，先要經過嚴謹嘅審核篩選，包括企業基本條件審核，企業必須喺內地經營兩年以上，全職員工100人以上、員工問卷回覆率審核必須符合指定嘅百分比。經過呢幾年，呢個排行榜已經成為內地最多公司參與及影響最大嘅僱主品牌調查。
余絲韻