喺大多數人嘅心目中，「富二代」係代表嗰啲含住金鎖匙出世、畀人寵慣又霸道嘅紈絝子弟。但根據巴克萊財富嘅最新調查就顯示，半數亞洲富二代做嘢勤力，仲認定自己應該要喺家族企業中大展拳腳，留低光輝印記，令家族成就更上一層樓添。
呢次調查係以亞洲區六個市場裏面，並至少擁有4,500萬美元財富嘅家族企業接班人做對象，旨在透視佢哋嘅價值觀、態度同埋個人財富管理需要。結果顯示包括大中華在內嘅亞洲區，普遍嘅富二代工作勤奮，只有唔夠半數認為財富係用嚟享受，調查結果同普遍認為富二代叛逆霸道嘅睇法大相逕庭。
大中華地區唔少家族企業接班人，將屋企人嘅期望當做動力，佢哋仲用大量時間做準備，以便日後履行喺家族中嘅責任。由於大部分係認為出於孝道或者責任，所以冇諗過其他選擇，包括自行創業。
富二代亦渴望能夠更多參與財務決策，以確保家族資產獲得妥善保障，甚至期望可以有所超越。大部分受訪者認為，最重要係有能力買心頭好，而佢哋諗住投資嘅嘢，同大家一樣，就係股票同物業嘞。
余絲韻