市場熱線：北控仍然有賣點

港股日日都咁反覆，認真難玩，但孖屐有人玩「過夜鮮」，見3點後港股跟住歐股反彈嘅話就入市博一博，到第二日高開即食胡。投資者對解決歐債危機仍然冇乜信心，就算意大利向中國開到口（其後否認），但內地亦有唔少反對聲音唔like買垃圾，況且班歐洲佬有事鍾無艷、無事夏迎春，唔肯限制高科技出口不特止，仲要製造貿易壁壘阻止中國貨入口，所以溫總今次趁你病要打死狗講價。

「哎瘋」概念受惠者眾

電訊股繼續係主角，祖國移動（00941）雖然再度上破80蚊未能企穩，但收市仍然微升，其餘聯通（00762）、中電信（00728）、數碼通（00315）、和電（00215）等全部笑騎騎，瑞聲科技（02018）亦掂，「哎瘋5」未出已先聲奪人，既然咁好，點解唔直接買蘋果公司？PE仲抵。

思捷（00330）派完成績表成隻散晒，今年已經搞成咁，出年歐洲仲大鑊，點算？原本股價同佢叮噹馬頭嘅國壽（02628）則有高佬唱好再升2.8%，買股先睇行業同市場，國壽呢兩樣已贏晒思捷一條街，所以古勝早前話打句問句都揀國壽。

高佬亦唱好粵投（00270），升穿5蚊再創新高，好多急跌股有反彈，好似友邦（01299）、長實（00001）等，但尋日上升同下跌股只係各佔一半，你買着南車（01766）同中鐵（00390）等股仍係眼濕濕。內房股繼續被質低，淨得恒大（03333）樓盤賣得好仲有得升，保利（00119）唔經唔覺由一年前嘅9蚊跌到得3蚊，阿媽個名幾響都冇情講。

主打業務民生所需

仲有半個月就「十‧一」黃金周，但濠賭股同零售股仍冇乜鑊氣，I.T（00999）前日勁跌一成，金飾股亦走晒樣，燃氣股反而保持硬淨，北控（00392）更升逾4%，一舉突破長達一年嘅下降軌。無他，中期業績仍有增長，派完成績表後可重新上路。古勝亦講過，北京舊年冬天不太冷，影響到燃氣銷售，今年仍係要望天打卦，但公司會開發北京遠郊新市場。

夏季天氣熱嘅話，對佢旗下燕京啤酒銷量有幫助，燕啤上半年賺多10%表現麻麻，比起青啤（00168）同雪花啤唔多合格，但燃氣、啤酒同供水係大半樣生活必需品，呢輪跑贏大市亦算正常，話晒由57蚊插到35蚊，彈番跌幅一半都值46蚊，可以等41.5元吸納，到時大約有一成水位，隻股已脫離最差時期，好過亂咁博其他股。

古勝