永泰地產（00369）CEO區慶麟尋日同絲絲食晏，仲有一大班新知舊雨，唔知係咪呢排少出嚟，佢話好多新知真係新相識，為咗「破冰」認識大家，佢就叫在場十五位朋友輪流介紹自己，有人好鬼馬，突擊問佢：「我叫咩名呀？」點知佢答唔出，當然即時引起哄堂大笑，而最後就由身邊同事代答。
老記恐怖過商界對手
佢話近排忙於搞業績公布，又要參與土地拍賣，所以唔係好夠瞓記性比較差。話說日前政府賣地，佢都在場。
有人就問佢，覺得場外大批記者蜂擁上前問問題壓力大啲，定係場內每口價成千萬上落壓力大啲？佢就話日前拍賣嘅三幅地，佢哋公司都冇預計過會獨資競投，所以冇乜壓力。反而每次入拍賣場，佢都希望有其他大人物一齊進場，轉移記者嘅視線。言下之意，即係話記者仲恐怖過商場嘅對手啦。所謂愈有壓力，就愈要面對，睇嚟區慶麟以後應該多啲出嚟見記者嘞。
余絲韻