被戲稱為「殺豬榜」嘅胡潤中國百富榜又放榜喇！最近喺香港搞緊上市嘅機械製造商三一重工董事長梁穩根喺短短一年間，身家就暴漲八成九，以700億元人民幣登上胡潤富豪榜嘅榜首寶座。
梁穩根依家嘅資產，主要係揸住內地嘅上市公司，包括三一集團58%，而三一集團又揸住兩家內地上市公司。集團旗下嘅三一重工最近就由內地A股進軍本港H股市場掛牌，有消息指集團集資273億元，相信屆時梁穩根嘅身家可能又再會升多幾升添!
喺尋日公布嘅《2011海南清水灣胡潤百富榜》中，梁穩根由舊年第四位跳咗上榜首，第二位就喺去年首富飲品巨頭娃哈哈嘅宗慶后家族，財富由喺去年800億元人民幣縮水至今年680億元人民幣。第三位係百度創始人李彥宏。
富豪榜另一個有趣地方，係前十名中有4位富豪以地產為主業，而財富排前50名嘅富豪當中，逾半數有從事地產業務。恒大地產（03333）嘅董事長許家印最巴閉，以460億元財富排名第五，取代萬達集團董事長王健林，成為2011年地產大王。龍湖地產（00960）嘅董事會主席、前CEO吳亞軍成為中國女首富，舊年呢個女首富係玖紙（02689）主席張茵坐。
余絲韻