市場熱線：中石油追落後有得諗

至於奧巴馬今晚演講內容已預先吹風，最主要兩樣嘢係大搞基建同減稅，預咗用3,000億美元，真係唔知錢從何來？但唔理咁多，最重要係先穩定投資者信心，有人投資自然有工做，但奧巴馬個如意算盤未必打得響。

調控樓市冇放鬆

祖國會減RRR消息亦谷起中港股市，其實已傳咗好耐，加埋個差別存款準備金率政策下個禮拜夠期後唔再續，所以愈傳愈盛，A股反彈2%。至於樓市則係壞消息居多，有城市未限購但限價，重慶話擴大房產稅，依家做大耳窿好過炒股炒樓，有幾間香港上市公司都公布做高息放數，之前內地樓市見招拆招，但呢次的確幾大劑。

尋日個市反彈得幾全面，799隻股票上升，302隻下跌，但水泥股仍然冇乜起色，得海螺（00914）、潤泥（01313）有得升，金隅（02009）創埋新低。逆市下跌嘅仲有雨潤（01068），管理層以每股7.46元行使購股權，本來每股賺10蚊沽貨都好正常，但投資者見班管理層咁低價都沽就梗係唔多like。

瑞郎大跌，亨得利（03389）升6.7%，另兩隻錶股英錶（00887）同東表（00398）亦分別升4.9%同2.2%，但呢類名錶股走勢好似同瑞郎冇乜關係，前排瑞郎升佢哋亦升，尤其係英錶強勢畢呈。燃氣股亦都好強，雖然中國燃氣（00384）曾有股東內訌，但擴展計劃反而加快咗。

祖國亦傳高性能鋼鐵產業會獲「十二五」規劃幾千億資金支持，包括減稅同補貼等，高性能鋼鐵令人聯想起特鋼之類，而造特鋼嘅有中信泰富（00267）同天工（00826），古勝覺得天工算幾硬淨，值得留意。

中聯重科（01157）逆市下跌，唔通要沽貨套現去認購三一重工同徐工？三一未上市已好巴閉，佢老細梁穩根仲做埋中國首富，呢排應該睇住三一國際（00631）好過中聯重科。

全年業績應唔差

三大石油股上個月已派成績表，最高分一致認為係中石化（00386），中石油（00857）雖然僅賺多1%，但仍有唔少捧場客，因為有4厘半息嘅藍籌除咗錢莊股就要數佢，中石油業績差係因為稅率上升、進口天然氣虧損同煉油業務一次性撥備所致，中銀國際預期隨住稅率回降同新實施嘅進口天然氣增值稅退稅入帳，公司下半年盈利將大幅提升。

今年上半年成品油價格加得慢，搞到兩大石油股煉油業務唔好，但呢排國際油價喺80幾蚊美元都幾舒服，煉油業務下半年肯定有好轉。而阿爺已宣布將西部開發公司嘅稅務優惠延長到二○二○年，中石油上半年畀多咗嘅稅喺下半年會扣番，另外亦會收到18億人仔嘅天然氣增值稅退稅，所以中石油全年成績表會大為改觀，講PE同息率都算吸引，值得逢低吸納。

古勝