沖個泡泡浴就賺過百億！咁神乎其技嘅事係神至做到，絲絲講嘅係股神巴菲特，佢日前扑錘落注50億美元買美銀優先股同埋認股證，亦喺浸浸吓浴決定，結果首日就勁賺13億美元，即港紙101億，回報高達25%！
眾所周知股神鍾意喺浴缸度浸出投資靈感同埋人生道理，今次都唔例外！話說喺○八年，股神向高盛注資後曾將經濟比喻浴缸，話浸浴嘅時候，浴缸裏面總不能一邊係熱水，一邊係凍水，所以華爾街業務問題一定會擴散至各經濟層面。
同年出版嘅股神自傳《雪球》裏面，亦提到股神細個已鍾意喺浴缸同家姐細妹玩碌波子；股神曾經講過腦袋等同浴缸，冇用嘅資訊，應該好似浴缸咁掹走個塞，放走啲水，騰出空間吸收新資訊。
鍾意喺浴缸度悟出真理嘅唔只股神，仲有聯儲局前主席格林斯潘！話說格老自七十年代開始培養咗個習慣，每朝6點起身浸浴紓緩背痛，此後成日喺浴缸度睇各類財金讀物兼處理公務，據聞佢帶返辦公室嘅講稿大多係濕淋淋添！
余絲韻