絲絲講場：藺Sir率領「狂牛」冧莊
由靈獅控股董事總經理藺常念親身帶領嘅「狂牛隊」（由不同金融圈業界組成嘅籃球隊）又贏波喇！絲絲講緊乜？咪就係一年一度嘅「第6屆金融界精英籃球總決賽」囉！今屆賽事經過連番激鬥，喺上周六舉行決賽，卒之由「狂牛隊」再次冧莊，以34分比27分戰勝恒生銀行（00011）。贏波咁開心，難怪藺Sir笑到四萬咁口喇，當晚佢仲即刻拉大隊去慶功添。比賽當日，佢老闆──靈獅控股行政總裁黃偉康（Andrew）都有到場撐狂牛隊。
12隊參賽旗鼓相當
唔經唔覺，呢個「金融盃」已經打咗6屆，由最初「小貓3、4隻」變成依家有12隊參賽，絲絲相信藺Sir當中一定付出咗不少心血及汗水。佢話：「今年有交通銀行（03328）、海通國際（00665）及時富金融（00510）隊加入比賽，佢哋嘅實力都好強，所以大家每場波都打得好辛苦，要贏冠軍變得難上加難，但有競爭先有進步，所以明年我都會繼續搞比賽。」
余絲韻