絲絲講場：證監新CEO揭盅 歐達禮十月回歸
政府尋日正式公布委任歐達禮為證監會新行政總裁，任期3年，將於十月一日返工。雖然外界對歐達禮嘅評價不一，但有份出任遴選委員嘅證監會主席方正就力撐，話歐達禮係證監會CEO最佳人選，因為佢對於香港金融市場及證監會運作都好熟悉。
歐達禮就話，佢好期待與證監會董事局及所有同事合作，喺確保證監會加強投資者保障之餘，同時促進市場發展。
傳屬最後四強首選
雖然歐達禮喺○一至○四年任職證監會期間，發生咗唔少爭議事件，例如仙股事件，以及證監會投資產品科前高級經理高秉忠去年出席立法會雷曼迷債小組聆訊時，又透露歐達禮領導嘅企業融資部曾與投資產品部交惡等，但絲絲聽聞，遴選委員會喺決定揀選歐達禮時，已一早知道亦考慮晒所有相關因素，而且歐達禮係最後四強中嘅首選，唔存在有候選人放棄唔做、歐達禮係次選嘅講法。
至於盛傳有獵頭公司接觸嘅澳洲證監會委員Shane Tregillis亦都有新動向，佢將會喺短期內離開澳洲證監會，喺九月份出任澳洲金融服務申訴專員（Financial Ombudsman Service）。
余絲韻