富士康科技集團董事長郭台銘早兩日喺深圳出席員工聯歡晚會時同人講，話家陣富士康有一萬部機械人，明年會增加到30萬部，喺3年後機械人嘅使用規模將會達到100萬部。話時話，每個機械人嘅成本唔輕，富士康咁重本投資，唔知係咪與佢哋近年嘅員工連環跳樓事件有關？
如果絲絲冇記錯，富士康喺內哋廠房嘅員工跳樓事件已經去到「第18跳」，富士康雖然都盡過努力安慰員工，希望佢哋唔好咁易自尋短見，仲請師傅睇風水及超度亡魂，但似乎都唔係咁奏效。
唔知係咪因為跳樓事件，令郭台銘想喺焊接、組裝、搬運、噴漆及檢測等生產現場引入機械人工作站，以取代工人。絲絲認為，增加機械人做啲簡單工序可以幫輕吓員工，的確係一件好事，但唔知有幾多員工到時會飯碗不保？睇嚟郭總真係要小心安排至好。
郭總仲話，家陣富士康員工總人數有120萬人，其中超過100萬人喺內地，深圳廠房員工就逾40萬人。聽落佢哋似一個小城市多過似工廠，梗係啦，富士康係中國最大嘅電子代工企業，亦係全球最大嘅電子代工廠商之一喎。
余絲韻