市場熱線：中金再生新高在望

香港股民最醒目，人哋恐懼時已貪婪，所以上個禮拜已跑贏美股多多聲，而美股鬧劇告一段落之後點部署？趁好消息沽貨囉！尋日恒指升幅亦愈縮愈窄，收市僅升223點，成交得631億元，道指期貨亦係愈升愈少，美金依然冇起色。

弱勢股避而遠之

今個月係放榜期，亦係另一利好消息，大笨象（00005）半年賺多35%，係預期嘅上限，倫敦開市即較本港收市價升2.2%，如果美債上限尋晚順利通過嘅話，恒指今日起碼可以上試250日線（22,879點），但要企得穩一、兩日先算收貨。華創（00291）買嘢升近4%創埋今年新高，內銀收市後又有股東賣股，但工行（01398）批股價只係輕微折讓，證明反應唔錯。

藍籌股氣氛幾好，但二三線股就拍馬都追唔上，尋日仍有超過400隻股票逆市下跌，創52周新低嘅股票亦多過創新高嘅股票。

新高股當中，又係零售股同濠賭股呢類熟口熟面。新低股最誇張係天虹紡織（02678），由8蚊高台跳水到尋日跌穿3蚊，然後倒升到3.32元收市。南車（01766）變咗爛車，同上海醫藥（02607）一齊6連跌。

另一弱勢股就係味千中國（00538），差唔多日日有壞消息，豬骨湯開粉相信所有員工都知道，唔係乜嘢商業秘密，點解突然會被祖國傳媒窮追猛打呢？古勝又想起雨潤（01068），模式都係先由小報報道一單負面消息，之後經由大報同網站轉載愈鬧愈大，跟住連陳年舊事都摷出嚟講，證明空軍好識利用傳媒攻勢。

富士康（02038）話用機械人代替人手，股價即刻回升，用機械人起碼唔使驚跳樓，但亦證明祖國嘅廉價勞動力時代已成過去，所以內需股抬頭、工業股捱沽已係宿命。差啲唔記得祖國尋日公布咗七月PMI，數據仍超過50好過預期，但好似已冇乜人理，A股微升，今個月係業績期亦係解禁期，傳聞話地方政府要沽股票減債。

美金睇見眼冤，商品價格間接受惠，古勝上個禮拜推介江銅（00358）時銅價亦已回升到每噸接近1萬美金，江銅尋日再創新高，唔買金屬股亦可考慮回收金屬股，中金再生（00773）呢排走勢亦好靚仔，主要係今個月派半年成績表已寫包單會盈利顯著增長，其實管理層上次派成績表之後已同分析員講今年收入增長達四成，假設毛利率冇變，今年預測PE得8倍左右。

受惠「十二五」規劃

收入增加主要係搞咗幾間合營公司，最大兩間分別喺廣州同天津，以前淨係做回收貿易，依家自己拆埋電器、車、船等，毛利率亦會高咗。公司回收嘅金屬主要係鋼及銅，祖國「十二五」規劃要求用多啲廢金屬，廢鋼比重由14%提高到20%。

香港都有好多爛銅爛鐵嘅回收商，呢個行業其實好分散，祖國亦都係一樣，中金再生想做龍頭企業，將大小回收商收歸旗下組成合營公司，達成「規模效應」，未來嘅增長前景應該唔成問題。依家嘅PE仲算幾低，預期派成績表前後有機會創下新高。

戰報

信利國際（00732）

信利國際經過半年的調整後低位回升，高仁睇準作推介，上周三低見1.21元後不斷攀升，昨升至最高1.5元，累升近24%。

古勝