藍籌股業績期今日展開，除了留意大企業盤數夠唔夠靚之外，仲會聽真企業管理層對未來經營環境的展望，從中洞悉市場對經濟走向的睇法。經濟周期有上有落，但何時係頂，何時係底又唔係咁容易估中。今年美國的NFL和NBA聯賽都鬧勞資糾紛，有學者指往往是經濟已到谷底的訊號。
在美國最受歡迎的三大運動聯賽，分別是美式足球NFL、捧球MLB和籃球NBA。NFL和NBA最近都因勞資雙方未能就分帳達成協議，要lockout收場，即係封館。NFL剛於上月底達成協議，但NBA仍未見曙光，繼續封館。
無球賽睇，或者係買股票最佳時機。有體育經濟學者提出，發生「封館」那年，往往係經濟最差之時。如一九七四年NFL封館，當年正值石油危機，市場氣氛悲觀； 一九八七年NFL結束封館不足一星期，就發生「八七年股災」；一九八八至八九年NBA封館，當年有俄羅斯國債引爆LTCM倒閉。
當中NFL封館最具啟示性，望返轉頭，會發現一九七四年、一九八二年和一九八七年都係買股票的時機。這是巧合，還是別有內情？
事實上，大型體育聯賽和經營球會都是盤大生意，如NFL上球季收益達90億美元，NBA也有43億美元。老闆們對經濟前景樂觀時會泵水大肆擴軍，看淡前景則希望開源節流。老闆不肯讓步，立場強硬至封館，反映對前景看法非常悲觀，往往正是經濟處於谷底之時。
大健
微博：http://t.sina.com.cn/taikin