孖妹缸湖遊：細數滙控之最

最早熟總裁 馬凱博

來自英國嘅馬凱博（Mark McCombe）紳士風度翩翩，今年只有44歲就做到滙豐銀行香港區總裁，可以話年輕有為，唔知係咪與佢早熟有關呢？

話說Mark哥12歲就開始做Part Time，試過做童工派報紙及幫人摘士多啤梨，不過原來佢嗰時只係為咗買手錶！高妹都明嘅，姐妹教落，識男人第一眼要睇佢戴乜嘢手錶，因為除咗係身份象徵，仲睇到佢有冇品味，唔知Mark哥睇中嘅係勞力士定係江詩丹頓呢？

講番正經嘢，祺祺仲記得Mark哥未夠20歲就單人匹馬闖入中國，做咗3個月Backpacker（背包客），咁細個就千里迢迢闖天涯，想話佢唔早熟都唔得啦！

最神聖掌舵人 葛霖

有人話金融界好黑暗，個個都好貪錢，祺祺就不以為然，淨係望吓有牧師資格嘅滙控前主席葛霖（Stephen Green）就知啦！喺金融海嘯後，葛霖曾經捐出「紅股」，之前仲呼籲業界取消巨額花紅制度，又話「賓卡」搵埋咁多錢，需要回饋社會，人類真正嘅幸福係嚟自貢獻，佢仲反駁著名經濟大師佛利民所講「企業嘅社會責任就係賺錢」。

葛霖話企業係要賺錢，但呢個只係副產品，佢又話部分「賓卡」太貪心，製造咗啲冇實質價值嘅產品，令社會付出代價。

其實喺佢擔任滙控主席期間，要面對次按及金融海嘯問題，而前任行政總裁紀勤隨CEO辦公室遷港，倫敦嗰邊就得番葛霖獨撐，之前仲有傳佢退下之後會做英倫銀行行長。

最體貼員工福利 生日假

生日一年一次，有得揀當然想放一日假大事慶祝啦！滙豐唔知係咪睇穿咗員工嘅心意，畀員工每人一日生日假。原來滙豐嘅員工福利真係唔錯，高妹有個朋友喺入面做，因為想重返校園讀書，就申請半年休假，佢仲話進修休假最長可以去到12個月添！

最有魅力領袖 王冬勝

你哋覺唔覺滙豐中國董事長王冬勝（Peter）與《花樣年華》嘅周慕雲有幾分相似？冇錯，佢的確係「銀行界梁朝偉」。孖妹見過Peter，佢真係好有魅力，唔好以為女性先會畀佢迷倒，就連滙控行政總裁歐智華都有幾次忍唔住公開大讚Peter，話佢打理亞太業務做得好出色。好似喺五月時，滙控首次公布季度經營狀況，歐智華多次就亞太區業務回應傳媒，講完幾句後，都叫Peter補充詳細資料。

Peter係大紅人，有好多公職，佢近年留多咗時間畀屋企人，只會選擇性出席活動，要一睹佢嘅風采唔係容易架。

最痛苦時刻 世紀供股

孖妹出道兩年，數到股壇上令我哋印象最深刻嘅事件，可以話係滙控喺○九年三月股價跌到只有30.55元。

話說滙控因美國業務勁蝕而要供股集資125億英鎊，要股東「科水」以12供5方式供股，供股價較停牌前折讓五成至28元，呢次世紀大供股係歷來最大規模嘅供股計劃，孖妹就與全港股民一齊「焗供」。其實呢次係滙控22年後再「抽水」，對上嗰次係滙豐銀行仲未遷冊倫敦成立控股公司，以8供1方式集資33億元。

滙控○八年下半年蝕19.94億美元（約155.53億港元），係滙豐銀行成立後首錄半年度股東應佔虧損，全年純利更挫七成。集團喺○三年購入嘅滙融一直表現麻麻，拖累北美業務喺○八年勁蝕155億美元（約1,209億港元），可以話係供股主因。

最高半年盈利 2007年

滙控○七年嘅中期業績令證券界大跌眼鏡，半年盈利達108.95億美元（約849.81億港元），創歷史新高。當市場關注滙控受次按重創，估計佢哋只可錄得約7%增長之時，「大笨象」好爭氣，中期盈利較○六年同期飆升咗近25%。

睇番環球業務，當時北美稅前盈利都跌咗35%，但多得包括香港在內嘅亞太地區扶佢一把；另外，個個都擔心次按會拖累滙控業績，但憑着企業銀行、投資銀行及資本市場（CIBM）業務，加埋工商業務強勁增長，咁啱內地聯營公司A股上市帶嚟收益，當時管理層已強調，滙豐係國際級新興市場銀行。

投資有Say 滙豐銀行中國業務部前總裁 王浵世 失望股東

王浵世係前滙豐大班，與柯清輝、劉智傑及葉迪奇被外界封為「四大天王」，佢同孖妹講，話自己離開咗滙豐太耐，對滙豐前景畀唔到啲好有價值嘅意見，不過佢話自己都係一個失望嘅股東，或者與好多人嘅感覺相同。

「反叛股東」 Eric Knight 不再重視

大家對於常向滙控「進諫」嘅「反叛股東」Eric Knight唔會陌生，唔知佢對滙控前景有乜嘢真知灼見？我哋早前曾聯絡佢旗下基金公司Knight Vinke副主席David Vinke，佢話滙控已經唔再係佢哋嘅核心投資，所以冇乜好講。唔通真係連「反逆股東」都失望到減持，唔想再發出呼聲？

滙豐前銷售人員、致富證券研究部經理 莊志豪 削支觀望

莊志豪曾經喺滙豐做過一年基金銷售，對於呢間公司文化有過親身經驗嘅佢，又會唔會買滙控？佢話「大笨象」好依賴亞洲市場，佢哋前幾日又話要裁員，要再睇吓係咪真係可以成功削減成本先喎，佢估計要業績掂，滙控股價先至上到80蚊。

26.2%散戶成功「七翻身」

港股經過「五窮六絕」後，喺七月終於有啲起色，截至七月二十六日，恒指當月暫錄正回報，但個別股票表現呈兩極化，強弱立見。總結七月份，你嘅股票投資能否翻身？據今期《東方產經》網上民調截至上周末晚上6時嘅結果顯示，26.2%人話有賺，其餘73.8%人就話仍然蝕緊錢。

（高妹）（祺祺）

若有料報畀高妹同祺祺或有嘢問，可電郵money.biz@opg.com.hk