市場熱線：國航買貨唔使急

港股雖然七月翻身得個吉，但成個禮拜都跑贏美股已還得神落，恒指上周五跌130點只係小意思，ADR周末前亦僅跌32點，主要跌中海油（00883）同今日放榜嘅大笨象（00005），坊間預期大笨象上半年可以賺多兩成幾，預測PE10倍、息率有4厘，講息率已高過呢排不斷創新高嘅兩電（00002及00006），但兩電勝在穩陣，大笨象要睇住歐美有乜冬瓜豆腐。

零售股恐炒過龍

內銀H股下跌，但內銀A股則勁升，中信行A股一度漲停板，有傳聞話祖國會減RRR喎，真係發夢冇咁早。友邦（01299）成績表靚仔，股價有機會衝上30蚊，不過，大股東AIG喺十月有機會沽貨，所以高位宜睇位食胡。

逢親市跌，成日聽人講「炒股唔炒市」，但依家嘅形勢係「炒市唔炒股」，個市忽上忽落夠晒刺激，但二三線股一味向下游，真係心傷。原本強勢嘅水泥股近兩日已冇料到，依然硬淨嘅得公用股同零售股，公用股強絕對唔係好事，而零售股有祖國減稅消息支持，但亦有炒過龍之嫌。

海爾（01169）阿媽買咗三洋白色家電，其中包括日本同東南亞洗衣機業務，海爾上周五最多跌4%，其後跌幅減少一半。古勝相信海爾遲早將製造業務賣埋畀阿媽，專心做零售分銷物流。不過，家電股最重要睇住下鄉仲有冇得玩，政策喺年尾就到期，暫時未有聲氣會延續。

兩鐵係呢排跌得最慘嘅股票，有內地傳媒話爆獨家料，指中鐵（00390）融資難、工程錢被拖欠，負債率高，而中鐵建（01186）相信亦係難兄難弟，雖然咁大間公司唔會執笠，但博反彈好似無底深潭。

溫總講到明高鐵要減速，包括興建速度同行車速度，無形中益咗飛機股，古勝呢排亦幾睇好飛機，上周一亦話國航（00753）有機會突破三角形走勢，隨即發生高鐵撞車，國航突破8蚊關口。其實講高鐵意外最大得益者應係東航（00670）同南航（01055），因為兩架飛機都係做內地線為主，而國航舊年有45%利潤來自國際航線，但其他兩間為怕高鐵競爭亦開多咗國際航線，所以近年亦競爭激烈咗。

料高鐵乘客回流

飛機股今年頭半年都係死氣沉沉，皆因舊年係盈利高峰期，今年業績預咗倒退，二來高鐵來勢洶洶，點知京滬高鐵通車之後反而有轉機。以國航為例，今年首季賺少23%，董事長孔棟亦轉軚睇淡全年業績，今個月派嘅半年成績表相信都唔好有太大期望。

不過，到下半年唔少高鐵乘客會回流飛機，本月開始航空煤油每月定價，就算全年盈利真係倒退，但預測PE仍只係單位數，計落仲買得過，如果穩陣啲，可以等埋派完半年業績至買未遲。

戰報

新秀麗（01910）+16%

帥哥前周四推介新秀麗，當日低位見過14.5元後，上周再發力，周五高位16.9元計，升逾16%。

青蛙王子（01259）+27%

古晨於七月二十一日推介青蛙王子，上周逆市做好，升至高位2.88元，累升幅度達27%。

古勝