要投資者留意你隻股票，起個好名好緊要，尋日上市嘅新股朸濬國際（08160），呢個名睇怕有好多人唔識讀，都算係引起投資者注目嘅另類方式。
喺上市儀式上，絲絲聽到好多在場人士討論「朸濬」呢兩個字應該點讀，直到主持開咪解開呢個謎底，大家先知「朸」嘅讀音係「力」，「濬」嘅讀音係「俊」。公司英文名叫Legend，讀音又與中文名好貼近，但實情唔係譯音咁簡單，原來公司名嘅解釋，係與部首有關。「朸」以木為邊，公司將此喻作古代客棧，與主營經濟型酒店業務雷同；「濬」以水為旁，公司就話希望藉此寄語客似雲來、川流不息。
絲絲仲留意到，港交所舉行上市儀式嘅小台背景屏幕，本來預設間開3行，分別顯示尋日上市嘅高鑫（06808）、青蛙王子（01259）及朸濬呢3隻新股嘅報價，但高鑫臨門跣腳，中間一行「吉」咗，咁用乜去填呢？答案係用主板及創業板嘅成交數字，但由於剛啱開市，只得幾行數，畫面都好多留白。
余絲韻