絲絲講場：聯合能源張宏偉罕有現身
民營石油商聯合能源（00467）喺香港上市已有十幾年，過去一直默默耕耘，去年做咗單大「刁」後即聲名大噪，就連主席張宏偉都畀人大起底。雖然張總位列內地富豪榜，但為人相當低調，更被媒體稱為「四大神秘人物」之一。絲絲尋日終於見到張總嘅廬山真面目，佢亦貫徹低調、唔多講嘢嘅作風，最後只係傾咗幾句，跟住又要去開會。
首批民營企業家
張宏偉以房地產業起家，係由地盤工由低做起，喺八八年成立東方企業集團，做埋董事長兼總裁，之後東方集團股份仲係黑龍江省第一家股票公開發行並上市嘅企業，亦係內地最早實行股份制改造並獲准上市嘅企業之一，所以張總係名副其實嘅第一批民營企業家。
其實東方集團涉獵範疇真係好多，除咗房地產，仲包括金融、糧油食品、礦產資源開發等行業。有冇興趣將東方集團帶嚟香港上市？張總笑笑口話一直都有考慮，不過依家未有詳細計劃。絲絲好有興趣想知，到時張總會先分拆邊一瓣上市呢？
余絲韻