不法之徒嘅行騙手法真係層出不窮，繼早前出現借金管局個名行騙嘅內地非法六合彩網站，令港人「目瞪口呆」後，尋日港交所（00388）發出聲明，話有冒充港交所授權代表嘅人士，曾經直接或透過互聯網接觸內地及香港嘅投資者，話佢哋可以畀錢港交所代為買股票。吓？港交所幾時開始同經紀搶生意，做埋佢哋嗰份？
話說港交所前晚接獲一對上海夫婦嘅舉報，佢哋出示一份以港交所名義草擬及印有港交所標誌嘅合約，內容大致係可以畀錢港交所代為投資，更離譜嘅係，合約寫明話港交所多年來積極參與內地二級市場炒作，又與內地私募基金好有聯繫，仲話投資可以賺取10至20倍嘅利潤。呢對夫婦喺六月二十八日已簽咗份合約，涉及金額30萬元。
好明顯，不法之徒係針對內地投資者對港交所嘅認識有限，以圖行騙，所以港交所收到呢宗舉報後，立即做嘢，除咗發聲明外，主要會喺內地廣發通知或刊登澄清告示等，希望內地人士唔好再受騙。
港交所亦已向本港有關當局報告事件，並將通報內地有關部門。港交所呼籲投資者，若發現有冒充港交所代表嘅人士以投資或集資為名與佢哋接觸，必須審慎處理，並應即時向當地警方報告。
余絲韻