依家地球上兩隻鬥得最犀利嘅手機品牌──蘋果公司及ＨＴＣ，佢哋嘅老闆除咗熱衷工作，仲有一個相同之處，就係「唔使為着乜嘢衫而煩惱」。蘋果公司行政總裁喬布斯十年不變嘅打扮被網友稱為「iWear」，而鍾情黑西裝嘅ＨＴＣ董事長王雪紅，就以色彩鮮艷嘅恤衫小勝一仗。
「時尚」呢個名詞唔啱喬布斯及王雪紅，事關佢哋唔鍾意嘥時間喺裝扮上。喬布斯永遠都係黑毛衣、Levi's 501牛仔褲及New Balance 991波鞋，呢個款式一着就十幾年。以前喬布斯着美國黑色高領羊毛衫，每件二百美元有交易，自從蘋果公司股價上揚，佢亦升級改着德國VonRosen、意大利Brunello Cucinelli訂製嘅毛衫，每件貴咗二至四倍，聽講佢每年定期上門訂製，一口氣就要五十件。
至於王雪紅嘅特色係着黑色西裝，再搭唔同顏色嘅Ｖ領絲恤衫。佢唔鍾意Shopping、唔跟潮流，就算着名牌嘅價錢都偏向大眾化，佢會着Armani、Gucci西裝，買恤衫就一口氣要唔同嘅顏色，相比喬布斯，佢已經算係有小小變化喇。
余絲韻